الصفحة الرئيسية

فريق العمل

عن الشاعر

بس النظر مش ضى ولا صوره
انا المسك واحس طبعك
اعرف ف طعم الروح من الريحه
ياما خلايق تضمنى لصدرها
بجته بارده وروحها زى التلج
ياما خلايق من حرارة كفها
تحس طعم الاشتياق والونس

سميع لأصوات البشر
، دا صوت كأنه
رنة الوتر الحزين
دا " تشلو " غليض محترم
دا " بوق " على الفاضى
نغمات بشوفها ف عتمتى
مزازيك ف ودنى كل يوم
، ف مش عجيبه لما اضم العود
. وادنددن

سهران ليالى تباعا
، لاشفت صبحي ولا
عارف ملامح ضى
، لكنى بفرح للصباح
وفيه بكمل سهرتى
… وساعات كده
بيجيلى احساسى الشقي
انى ها افتح فجأه ع الدنيا
، اظبطها ليا بتبتسم
… فخاف قوى
. واجرى استخبى ف عتمتى

عارف بأن الدنيا بنت متغندره
سايقه ف دلالها وكل الخلق شغلوها
"خايف اشوف دنيتى تطلع كده "مكعبره
، يبقى العمى احسن
. من شوف طشاش وقتها

حافظ شارعنا بالحفر
واصحابى بالقهوه وبالنكته
واعرف بلدنا ع الخريطه وحدودها
والمس بأيدى النيل واملس ع الشجر

. ويقولو قال عاجز نظر