ايه … يا
اخينا
ما تحاسب
! مش شايف يعنى
ولا ثبات خطاويك بيغرك
وبيعمى عنيك
بتدارى ضحكتك المكتومه
طبعاً تتريق على قصرى
، وأنا مين هايقولى
غير شبر ونص
طب مين هايفوت قفشه تضحك
، وأنا واقف
مش قادر اطول تليفون الشارع
ولا طايل عتب الأتوبيس
مع انى بشوفك ف الأتوبيس
تطوح زى عروسه ف خيط
لكن ما ضحكتش
، واستغرب من طولك
الزايد عن كل حدود
لو تعرف
أنا بتصاحب ويا حاجات
عمرك ما ها تقدر تفهمها
أنا اكتر منك خفه
، حتى الجاذبية الأرضيه
بتسطلطفنى
وعيال الشارع كلها تعرفنى
، حافظ كل النكت اللى بتتقال
على قصرى
واعرف اتريق على روحى
أكتر منك
واعرف اوقف فيك
الضحك عليّ
إصرارك انى الشبر ونص
والأدهى ضلك يخايلنى
رايح …. جى
يا أخينا … حوش ضلك عنى
! لسه بتضحك
! لسه بتتريق
وأنا ممكن وبكل بساطه
أتعمد أدوس على ضلك
وأوجع روحك
وأبقى سعتها
أتريق تانى
. وقول الشبر ونص
